和花亭壽司 (已結業)

其實之前同朋友喺裝修前嚟過次，食物評價唔錯，就係環境比較差，今次終於等到佢裝修完再試食。除咗環境大變身外，餐牌食物都大改。先嚟嗰新推出嘅細海膽一板，價錢唔算貴，而且鮮香味美，完全唔會有怪味，性價比一流，必食！每次都會試嘅燒鯖魚，依然保持高水準，無咩腥味。巨型帶子壽司、劍魚壽司，帶子非常新鮮，濕潤極具光澤，品質完勝！劍魚比較少食，不過感覺都唔差。芥辣八爪魚軍艦，上台時紫菜仲脆，雖然都係醃製品，不過八爪魚亦係新鮮貨，唔覺佢放得耐，無咩好挑剔。和花亭特色食品之一嘅自家製厚燒玉子壽司，玉子比裝修前更甜，蛋香更濃，依然係必叫之選！三文魚手卷，雖然紫菜仲脆，不過飯團幾鬆散，三文角質量只係一般，而且份量算少，有啲失望。最後試咗個甜品「柚子雪葩」，果汁濃度奇高，好有刨冰嘅感覺。整體嚟講裝修後環境、食物都好咗，如果食Lunch Set就更化算！