呢度其實好細，只擺咗幾張枱，最好 book 定位先。講到 service 拍得住酒店架！但最重要係好食得嚟又唔太貴。

意式雜菜湯係跟餐嘅！落足料水準唔錯架！而周打海鮮湯亦係跟餐嘅！味道 OK 但唔夠雜菜湯好飲。

金船長芝士漢堡包係金船長嘅招牌作，呢 $40 唔慳得，真係要試吓！單憑以下對話就知個包一定好得；
侍應 : 請問個包嘅牛肉要幾成熟呀？
王子 : 6 成熟呀！
侍應 : OK！6 成熟 . . .
酒店先會問要幾成熟，點估到喺大角咀一間餐廳都有呢招？勁呀！

厚厚嘅洋葱捲住 juicy 到爆嘅牛肉 . . . 引死人咩？嗱！你睇牛肉幾厚，真係 6 成熟架！肉汁多到瀉添！薯條係配角？No 啦！熱辣辣兼薯味十足厚切上，食完包你有一排唔想食麥記 . . .

金船長小食併盤要 $55 有啲貴？你食過先知物有所值！

焗蜜糖雞翼有少少出乎意料，因為一般餐廳個小食併盤嘅雞翼都係又硬又乾又唔熱，但金船長就啱啱相反，雞翼焗到熱辣辣，咬落啲肉仲好嫩口添！

炸手指魚柳亦一樣炸到又熱又脆口，炸洋蔥圈唔駛講啦！我掛住食到連炸咖喱角都漏影

自選車仔意粉試過就會明白點解金船長咁鬼偏僻都有咁多 fans ，講到配搭嘅款式之多及靈活度甚至勁過好多車仔麵檔添！佢哋仲列咗幾個心水組合俾啲唔識或懶得配搭嘅朋友。自己「飛佛」嘅組合係意大利粉配卡邦尼汁及巴麻臣芝士，配料揀肉醬、蟹肉、煙三文魚及中蝦，價錢順序係 $40 + $5 + $8 + $8 +12 = $73 唔算貴，而且豐儉由人，配個平組合亦得。焗到熱氣騰騰上枱，無論賣相及味道都一流，正！

自選車仔意粉加 $30 變套餐，餐飲仲可以揀特飲，抵俾到極，我揀咗石板街黑牛同薄荷朱古力咖啡，尤其是薄荷朱古力咖啡王子瞓身推介，一杯冰凍咖啡飲得出幾個層次，薄荷、朱古力及咖啡壁壘分明，唔似一般餐廳咁咖啡只得一絲薄荷味，絕對達到酒店級水準。

金船長梳乎里 ( 橙味 ) 係金船長嘅 2 大皇牌甜品之一，脹卜卜、熱烘烘，跟餐價只係 $25 ，比散叫平得多，賣相及味道只可以話 OK 啦！