佳記甜品 (已搬遷) 新店位置

難得地鐵半價入元朗，當然要順便探吓B仔，上次食，已經幾年前，今日下午五點嚟到，唔係化，要排隊等位，駛唔駛。蒜蓉香辣雞翼尖，彷彿呢道小食已經變為B仔的招牌菜，平均每枱都有碟，有啲仲一人一碟。今次再食，同幾年前的味道一樣，雞翼尖整得好入味，仲要好辣，一路飲水，一路食。雞翼尖煮到好稔，入口好輕易就皮肉同骨分開。B仔涼粉，學人話齋，B仔涼粉有乜特別？？好食？？還可以喇，不過不失，但最主要賣點係抵食夾大件，七十五蚊，五、六個人食，都夠分，平均每人十蚊多啲啲。涼粉面真係放咗爆多生果，有西瓜、哈蜜瓜、密瓜、香蕉、水蜜桃、海底椰、蘆薈、奇異果、大樹菠蘿，你話誇唔誇？？仲有半碗花奶伴上，方便大家不同的需要。