潮營火鍋小炒菜館 (已結業)

前兩日同老婆去上水行街，去到符興街馬會道附近，經過潮營火鍋小炒菜館，見到啲食客食大大碟酸菜魚，即時口痕，入去試下先。環境方面：地舖嚟講，入面算幾大喎，地方乾淨👍服務方面：職員姐姐好健談，同啲食客吹水，不亦樂乎，街坊生意，夠親切。食物方面：一嚟就送碗火湯先，飲落應該無味精。酸菜魚(小辣)，唔使二百，但超超大碗，裏面有魚肉、豆卜、芽菜、酸菜、寬粉等等，偏向酸嘅，好開胃，可以加錢加爐打邊爐，不過我哋無加😎👍蠔餅，佢用比較大隻嘅蠔仔，味道好，唔太油，點少少魚露，味道啱啱好👍蒜蓉炒菜心，夠味嘅。京都豬扒，幾多肉，甜酸剛剛好。總結：大大碟，好抵食，加埋汽水，都係442，佢嗰度仲有雞煲，下次去試埋先😎