群記清湯腩 (已結業)

曾經聽過群記清湯腩係全香港最好味嘅清湯腩，一直被咁洗腦，今次就特登去咗大埔試下。群記清湯腩開放時間係中午12點至7點，但係其實佢5點幾就會賣晒沽清，落閘收舖。講真佢咁嘅開放時間真係應該得大埔人或者好似我咁特登閒日走入去嘅人先有機會食到。不過小店就係有呢一種魅力同傲氣，唔係要賺到盡，收工就收工，玉皇大帝都無情講。我大概5:00鐘嚟到，鋪頭有幾個客人，坐到入去阿姐話河粉賣晒，得返米粉伊麵粗幼麵。其實我個人覺得牛腩係應該配河粉，但冇計，賣哂😂😂我哋2個人叫咗一碗肥腩米（$53）同埋一份淨爽腩（$150）。爽腩其實可以跟粉麵，但多數係開鋪頭一兩個鐘頭就會賣晒，之後嘅客人如果仲想食爽腩就要嗌淨食，$150一碗。好好彩，我地當日原來係食到最後一份淨爽腩😋😋肥腩米一上枱，已經見到個湯好膠質，白色、透明、有牛油係面，淨係睇個樣已經舔哂脷，攞隻匙羹飲左一啖，已經值回票價。真係未試過飲咁好味嘅清湯腩湯。佢啲肥腩嘅份量仲要係多，一碗米粉有咁多舊肥腩，好抵食。至於淨爽腩好似就係牛橫膈膜嗰邊，好膠質、唔肥、好味，佢啲蔥花好靚，錦上添花～因為碗米份同個爽腩都油，所以兩個人食咁樣已經好飽。食完出嚟5:26pm，阿姐