元札幌拉麵 (悅來坊) (已結業)

食過荔枝角元札幌拉麵至知咩叫大件夾抵食，今晚去大窩口都見到一間，七點已經有幾多人，相信質素都唔錯，對腳好自然行入去搵位，一個人好易就有位，環境同荔枝角差唔多，幽暗中帶點偏紅色，但多左個大大多拉A夢企響店中間「睇場」，感覺上比較細，不過又幾有親切感。Ankake 拉麵（$72）好大碗，麵多唔載講，麵質適中，糖心蛋好靚，湯底鹹度適中，食後唔口渴，真材實料，加多$28就可以追加自家製手包餃子一客，有四件香煎手餃，好有屋企味👍🏼👍🏼北海道南瓜炸薯餅（$18），即炸熱辣辣，南瓜肉融入薯蓉中，香、甜、滑嘅內餡，配合脆卜卜外層，口感一絕，大大件伴上沙律菜，雖然食得出炸油新鮮度不足，但十八個大洋真係好抵食。