是日, 本來打算係牛池灣搞掂, 不過, 當巴士轉入坪石前, 想起廟旁邊, 有一座舊式唐樓. 聽聞過有一家古老冰室. 一落車, 便行返出觀塘道, 尋找隱世的味道. 結果有兩個發現, 一.) 是呢一間又殘又舊既華生冰室, 二.) 是隔幾個鋪位, 一樣又殘又舊既龍泉酒樓. 聽到要拆, 歲月神偷說, 要留腳印, 便要早點來.
呢幾棟唐樓, 啟德大廈, 位置好isolated, 因為面對的, 是賽車勝地之一既觀塘道, 連接太子道既高速位. 旁邊, 隔了一個廟, 是坪石邨, 另一邊, 又行好遠才見到淘大. 後而是山. 前後左右, 都無一物, 最近既砰石邨都要行上一個字...自成一角的生活小區, 同周邊人口密雜既屋苑及大型建築不相連, 啟德大廈, 又的確幾特別, 是觀塘道上的一個孤島.
介紹完地點, 就要介紹餐廳. 入到黎, 的確既殘舊到不堪設想. 想拍一拍照片, 但老闆娘在樓面東望西望, 又同街坊探討以上兩件事. 所以沒有放膽去拍. 而且, 一入門口有一種好古怪既氣味. 坐了一會才能習慣下來.
3點3, 食下午茶吧. 餐牌中有豬手麵, 就來試試看老冰室的豬手得唔得. 聽開老闆既conversation, 記者曾經問佢, 冰室同茶餐廳有什麼分別. 他說我呢一個年紀, 好難講出有什麼分別, 因為冰室是30年代既產品, 到接手時, 已經演化成茶餐廳. 手指一指, 我呢間根本是餐廳, 冰室應該只是賣奶茶咖啡, 菠蘿油的. 那會有咁多野食. 心想老闆哥, 說不懂其實懂, 只是不想上電視做節目而已.
說回豬手麵, 豬手既味道雖然不太濃郁. 但鹵水味五香味都幾夠, 而且腍到冇牙既都可以食到, 可以加分. 麵, 煮公仔麵既功架不錯. 麵剛熟, 湯底又有好香既麻油味. 是經驗得來的功夫.
而奶茶, 濃香滑齊集, 而且沖到起了一層薄皮. 好飲, 但總覺得再要加多一點點奶, 味道會更香滑.
咁isolated既地方, 可以做到咁耐生意, 係呢一個舊屋苑經營生意者, 應該有佢地既獨得生存之道. 食飽, 對此地方沒有什麼留戀. 喜歡舊嘛, 下次再來會找一找隔離既龍泉.
入面是怪味氣體, 出面是汽車廢氣......行返入坪石才能嗅回清新的空氣. 過埋橋到牛池灣, 找到小巴站, 上路回西貢去.
