旺角海鮮菜館

營業中

休息中

今日放工同朋友去旺角行街，一直都知洗衣街呢邊有好多野食，但好少過呢邊，經過就入左嚟呢間中菜館。一入到去見到有好多海鮮，即叫即整，裝修亦有傳統中式菜館既感覺，坐位都好舒服。坐底會問我地飲咩茶，可以揀鐵觀音/普洱，我地揀左鐵觀音。枱面有花生同辣椒豉油碟俾我地沾海鮮食。佢有個宵夜套餐，可以揀瀨尿蝦，龍蝦或者大青蟹，最後我地揀左蟹。避風塘炒大青蟹。有成隻蟹既份量，炸蒜既量好多，蓋過左隻蟹，食完都仲有好多，好夠味。蟹好新鮮，多肉，唔會得個殻。殼都唔會厚，咬都咬得開，蟹蓋都有大大舊膏。蟹鉗會預先幫我地夾碎，另外員工見碟滿殻會即時幫我地換，好貼心。白灼鮮魷魚/韮菜花。淋左小小麻油同豉油，即使白灼都夠味又唔會好咸，麻油令佢多左份香味。鮮魷魚都夠淋，咬落爽口。油鹽水浸蜆。蜆既份量都幾多，有成大碗滿。入邊有粉絲、芫莤、菜、蔥同辣椒，胡椒味好重，有小小辣味，食落同蜆好配，亦令粉絲好入味。蜆都幾新鮮，唔會有沙。豉油皇炒麵。用左蔥、芽菜、洋蔥去炒。有傳統港式既味道，炒得好入味。炒麵會會痴埋一舊食落亦唔會太油。