個日係星期六，好多人排隊等位。好彩我地得2個人，好快就可以坐門口張檯。
即刻點杯summer drink，叫左"只想放假"，係香芋泡沫加上Novell coffee。我鍾意香芋同咖啡兩種香味混合既冰凍飲品，夏天感覺一流!講起Novell coffee, 除左夏日特飲，佢仲有一本薄咁多唔同配搭既咖啡。我下次要試下蘋果咖啡!
前菜都係我最愛既焦糖單骨雞翼，加上首次嘗試而帶俾我驚喜既烤蝦芒果沙沙多士，感覺好清新。主菜都係西班牙黑毛豬薄餅加黑松露雜菌寛條麵，薄底薄餅，餡料有黑毛豬片，番茄，火箭菜同芝士，味道維持到一貫水準。寛條麵黑松露香味十足，飽肚首選!
今次想多講既係夏日甜品，叫做"夏日綿綿"。頂層係好大舊同充滿童年回憶既綿花糖，中間有粟米片同乳酪，底層係啫喱同草莓，食落好有層次感，又唔會太甜。杯甜品好大杯，兩個人食剛剛好，一個人會食唔哂! 最貼心既係餐廳會預備埋長條既野叉俾你，唔怕食唔到底層!
