Promenade 西餐廳

營業中

休息中

其實都幫襯左幾次，主要係因為性價比高，食物選擇多之餘，檸茶檸水奶茶可以任飲，雖然係平嘢，但係一般酒店自助餐得一杯真係唔夠飲，比晒你飲成本低之餘，仲可以令到顧客滿足，飲飽食醉缺一不可嘛，有嘢食有嘢飲咁先夠回圓滿。網上訂位仲做緊折頭，真係勁抵。今晚係夏天主題，主要係多左大排檔嘢，好似辣酒煮螺，粉絲蒸扇貝，咖哩炒蟹，仲有用椒鹽整麵包蟹，當然仲有主角椒鹽瀨尿蝦，椒鹽瀨尿蝦，椒鹽瀨尿蝦，重要既嘢講三次，當然唔會好似鯉魚門咁成隻手臂咁大隻，但係都叫有誠意，任食瀨尿蝦喎，仲想點，亦都相當入味，廚師下下一拎出黎基本上係秒殺，真係要眼明手快，不過亦都refill得好快。另外基本嘢都係水準，長腳蟹腳又粗又甜，一定算多肉，仲有生蠔，片皮鴨，鴨肝多士，刺身亦唔孤寒，總共有七、八款，師傅係可以每款比兩三塊你，擺滿隻碟仔，唔似得有d酒店自助餐每次限拎幾多款咁。甜品除左一般有既雪糕，蛋糕，生果，朱古力噴泉等寺，仲有火燄蛋糕，雪糕蛋糕加酒精香味都幾特別，仲有即整梳乎厘，燕窩等等。最後要讚下黎經理，服務好態度好，亦樂意接聽取意見，總之係好滿足既一晚。