何賢記甜品世家 (已結業)

西環嘅甜品店好多，但專做中式糖水嘅就好少。雖然係咁，但做唔做得住始終要睇食店係咪真材實料。何賢記店內環境好新淨光猛，唔會好似啲傳統中式糖水店咁俾人一種較舊嘅感覺，呢一樣野係增加左令人光顧嘅意慾紅豆沙、綠豆沙、蕃薯糖水、燉蛋/奶呢啲傳統野當然有，今次喺何賢記試左芝麻糊燉鮮奶同芋圓紅豆沙。先講芝麻糊燉鮮奶，燉鮮奶中間開個細細嘅窿注啲芝麻糊入去。燉鮮奶唔算燉得好滑，鮮奶味都唔係好濃，芝麻糊只有中間少少，覺得可以再加多啲芝麻糊。至於芋圓紅豆沙，原本想食紅豆沙加啲湯圓，但湯圓加一粒要HKD 4，芋圓份量會多啲，好似抵啲😂，諗住同樣係煙韌嘅野，就簡左芋圓紅豆沙。紅豆沙好足料，果皮、蓮子、百合都好多，但紅豆反而有啲少。而芋圓啲味都算出，幾好食。想食中式糖水嘅話，呢間都算係唔錯嘅選擇。