滿樂中菜 (已結業)

話說這晚家姐約咗大家去戲曲中心食中菜，當時聽到戲曲中心都有啲懷疑家姐係咪噏錯地方，結果去到之後，發覺原來內有乾坤，對於呢間“滿樂中菜”食物水準有啲喜出望外，餐廳環境亦舒適寬敞。首先上枱嘅係蜜汁叉燒同脆皮燒腩仔，叉燒軟腍適中帶咬口，唔會太甜同過腍；而燒腩仔則皮脆口肉質肥瘦分明，富有層次感嘅口感十分討好。椒鹽九肚魚炸到恰到好處，外層帶微脆，內層卻保留九肚魚鮮甜帶汁肉質，完全唔會有乾爭爭嘅感覺，突顯師傅製作細膩之處。跟住落嚟梗係唔少得滋潤嘅杏汁燉白肺湯啦，一上枱已聞到陣陣杏香味，湯水濃郁綿滑口感同軟腍並一啲內臟腥味都無嘅白肺，令人一再回味。肉餅蒸蟹圈，一道相當有趣嘅菜式，肉餅上依附著大大隻螃蟹，而且膏滿香甜，肉餅本身都已經十分不俗，在蒸嘅過程再吸收埋鮮甜蟹汁，味道層次提升唔少；而帶有絲絲肉餅香味嘅蟹肉則令人有驚喜，值得推介。酸尾尾又開胃嘅蒜香梅汁蒸白鱔片係家姐嘅至愛，彈牙嘅白鱔肉配惹味蒜香梅汁，即刻有想添多碗白飯嘅衝動。全晚用餐感覺十分良好，見餐牌內仲有好多嘢大家都想試，所以已約定下個月再度光臨。