老夫子餐館 (已結業)

好友今日打電話黎約聚餐, 話去多次喺太子既"老夫子餐廳"。我先醒起上個月去過, 但係冇寫出黎。上次其實係我第一次去, 去到大廈門口已有成個人咁高既老夫子像擺咗喺到, 咁就ㄧ定冇揾錯地方。沿樓梯上去, 已見到成間以老夫子漫畫人物作佈置既餐廳, 兒時回憶即時湧現。如果鍾意睇老夫子既, 果到直情係打卡既好地方。當日我見到既侍應全部係年青人, 服務態度謙恭有禮, 值得稱讚👍我地果日點咗兩份lunch set: (1)乾炒豬扒河粉, (2)卡邦尼煙鴨胸炒意粉。 Lunch set有湯, 主菜, 同埋飲品。乾炒豬扒河粉比想像中好, 河粉雖然唔可以媲美大酒樓既鑊氣, 但都可口, 豬扒好林滑。反而個卡邦尼煙鴨胸炒意粉較乾, 鴨胸切成條狀不夠香, 份量好少, 感覺唔係好值。聽講呢間餐廳既蛋糕幾好食, 叫lunch set加$20就可order1件, 可惜果日已食到好飽冇order到。今次再去就可以試下。