馬來屋星馬泰美食 (已結業)

前幾日要去新蒲崗做嘢，鑽石山地鐵站附近有間好大嘅文具佬，買完嘢就求其搵間餐廳，一個人食個午飯，一上電梯就見到呢間馬來屋，平日下午一點半滿座，相信都唔會好伏啩。坐低之後店員俾QR code我自助落單，枱上面都有擺menu (個人唔鍾意依家好多餐廳連實體menu都無埋)，價錢算合理，午餐$55-60蚊，我揀咗個香茅豬扒冬陰公湯河，加埋$3凍飲總共$60。湯底正常，有少量香料、芽菜、車厘茄同埋菇，清清地嘅冬陰公味，唔好expect呢個價錢嘅冬陰公湯底會有海鮮味就得，小小辣小小酸，個人覺得可以再酸dd。河粉偏幼身，香茅豬扒已切件，係有骨豬扒，幾大塊+厚身，厚到略嫌實淨，不過幾夠味，算唔錯。整體來講都幾好，環境都ok，乾淨同埋算闊落，唔會每張枱逼埋一齊，如果下次再嚟呢頭，又諗唔到食咩，都有機會翻兜。