鮨瀛海 (已結業)

尖沙咀鬧市裏面竟然開間壽司外賣專門店，呢間鮨瀛海相當高質，全部都係飛機直送，令人有返喺日本食壽司嘅感覺。第一次幫襯，少少哋試吓先。飛機直送係屬於廚師發板，我偷睇到另一客人買嘅確係有啲分別。真鯛即係香港人所講嘅赤鱲，肉質比較結實，彈性十足，入口釋放出油脂，味道甘甜。赤伊佐目就係香港講嘅雞魚，肉質柔軟中帶點爽脆，魚油適中，作為刺身比熟食嘅味道更佳。劍魚腩嘅味道並不陌生，佢嘅肉質柔軟亦充滿油脂，但鮮甜而不油膩。魴鮄近年喺香港比較優質嘅壽司店都會見到，肉質鮮甜爽口，我對爽口嘅刺身特別情有獨鍾。深海池魚肉質鮮嫩肥美，脂肪厚充滿魚油香，入口甘香細膩。剝皮魚係香港人稱呼為沙鯭，脂肪含量相對較少，而蘊含豐富嘅蛋白質同其他營養元素，健康又美味。白玉貝肉質厚實爽口，就好似食緊爽口嘅蟶子一樣，同時亦帶有鮮味。左口魚邊一向都係我嘅至愛，滑滑嘅口感加上炙燒嘅炭燒香味，再配以少量蔥花，味道怡人。另外仲揀選咗店員推介嘅軟綿綿手卷，入面有黑松露玉子、左口魚邊同埋穴子，三款材料都係非常軟滑，連埋飄香柔軟嘅珍珠米，真係好有軟綿綿嘅感覺。呢間鮨瀛海嘅出品整體感覺都好好，用料新鮮，服務亦好好，所以絕對值呢個價錢，下次經過我都