深宵食堂 (已結業)

尖沙咀區出名多野食, 但係朋友霎時間想食串燒，真係突然之間俾佢考起。不過上網揾一揾，見有幾多人都讚呢間餐廳好食，咁我地都二話不說，即刻上黎厚福街嘅深宵食堂醫醫肚。望望個餐牌，都幾多款唔同野食，而且價格亦相當平民化，所以我地唔駛特別點樣錫住個銀包，盡情咁order。呢度上菜速度都相當快，話咁快就黎杯巨峰提子梳打，同埋幾款小食。杯野飲都真係幾真材實料，巨峰味十足，相當清甜解渴 ;)而小食同樣值得一讚！蒜片牛柳香氣撲鼻，肉質亦嫩滑; 芝士蝦球同埋芝麻雞翼炸得亦香甩金黃，其中蝦球特別係我嘅至愛，蝦膠打成嘅蝦丸，再配埋芝士去炸，口感同味道都係雙重享受！接著嘅炸蠔同埋汁燒白鱔，我都覺得大家要試一試。雖然個蠔經過油炸之係，但係依然食得出亦非常新鮮，絕非普通嘅雪藏蠔; 而白鱔更加唔駛多講，啖啖肉嘅享受，肉質亦鮮嫩無比，再配上特製嘅燒汁，係全晚嘅highlight!!最後我地叫左兩一口牛同埋日式餃子作結，一口牛質感非常嫩滑，完全係上等牛嘅質素; 而餃子亦皮薄餡靚，咬落去亦有充滿肉汁，非常好食！