池記 (已結業)

同個friend去又一城逛街，行到咁上下，又到醫肚時間，呢度食肆雖然多，不過都偏貴，所以最後都係揀咗Foodfest，雖然只得譚仔三哥、池記、太興、吉野家、大家樂、麥當勞同Pepper Lunch呢幾個快餐選擇，但都人頭湧湧，皆因大家都想食得經濟啲。喺池記要咗個蘿蔔牛筋菜飯包熱飲$53，另加$16配多碟上湯芥蘭。賣相雖然普通，但味道相當不俗，蘿蔔唔會太腍，牛筋都夠入味。個菜飯乾身咗少少，不過淋返啲牛筋汁落去，咁就啱啱好。上湯芥蘭清清哋，一般水準。熱飲我揀咗薏米水，望落平平無奇，原來入面有蜜棗同薏米，飲落仲有薑味，都幾好飲。