Table 18 Bar & Restaurant (已結業)

觀塘有好多工廠大廈開左西餐廳, 不過好多都要預先book, 有D甚至要一個星期前book定... 如果即興想食西餐都係要去返商場/街舖。我果日係weekday去, 大概7:45左右到, 已經排晒隊要等起碼等6,7張枱, 職員叫我地8:30返去。咁啱猶疑緊轉去邊度食既時候, 突然個職員問有冇兩位, 於是我地兩個好好彩咁又即刻有位。叫左個卡邦尼綠茶幼麵 ($98) 同夏威夷薄餅 ($118)。主菜未到之前有麵包條食。室溫, 唔係新鮮, 不過完本冇預左有, 所以冇乜所謂。卡邦尼綠茶幼麵到先。呢個唔係好得, 只因個卡邦尼汁同一攤水一樣咁稀。佢個原意係好, 俾既唔係一般既pre-made卡邦尼汁, 係俾蛋黃你去撈而完成呢個汁。可惜果攤水落唔夠cream同未煮夠濃度就已經上碟。附帶一提, 碟意粉好細碟。食完晒個意粉個pizza都未到, 如果waiter事先同我地講pizza要耐D會比較好。個意粉已經唔係話十分快上, 加上份量偏細, 所以等pizza等到好餓。不過個pizza絕對值得等! 熱辣辣, 薄批, 足料, good! 非常滿足。