永樂冰室 (已結業)

最近幾次係IFC食添好運，見隔離開咗間新嘅冰室裝修光猛企理又唔使排隊價錢經濟，諗住搵日試吓啦。琴日一行四人諗住去試吓，唔使等即刻有位。三個同事一致揀咗胡椒豬肚湯雞肉米線$60，我就揀咗個水煮魚米線$65。等緊食物嘅時候阿姐不斷送錯隔籬枱嘅食物俾我哋，同埋成間餐廳都係用即棄餐具，極唔環保。冇計啦，可能IFC貴租整多個地方黎洗碗又要請洗碗姐姐計唔掂條數，所以就選擇即棄餐具。好啦到食物嚟到，個份量對於男仔嚟講係偏小嘅，對女仔來講可能就啱啱好。水煮魚米線，個湯好似落咗辣椒油嘅米線一樣，完全唔係水煮魚嘅味道。魚塊既份量正常，有5至6舊。米線偏淋無咬口。同事叫嘅胡椒豬肚雞肉米線全部都係雞胸，十分之鞋口難食。總括嚟講咁嘅價錢同咁嘅食物質素，簡直係10個伏，可一不可再。寧願去食兩餸飯好過。中環嘅午飯時間完全唔使等位，唔係冇原因嘅。