叫咗一個意粉同半隻燒雞，加錢轉咗一個做餐，見到佢個湯我真係呆咗，佢用咗隻好可愛嘅貓貓杯嚟裝，但係佢只係裝咗1/4杯左右（可能都冇）嘅湯俾我😅
之後嗰半隻烤雞黎到，我哋呆咗😧佢嗰兩嚿雞仲細過KFC嗰啲雞，然後再加一pat仔薯蓉同少少蘆筍粟米仔就上碟，個汁又唔好食，食完又唔飽，完全唔值咁嘅值錢。
（近鏡影可能唔覺佢咁細，實物係真心細。我好鍾意食燒雞，佢真係我食過最迷你嘅烤雞)
至於個意粉，係味道正常份量偏細嘅意粉，而個洛神花茶嘅味道就好似加咗花瓣嘅熱水咁🤯 但係我見到其他枱嘅嘢食，例如佢個豬肋骨同薯條，離遠睇個份量好似正常少少🥲 如果大家都真係想試呢間餐廳個人建議千祈唔好嗌佢個燒雞，真係幾啖就食完。
環境方面，我哋嗰日由六點鬆啲坐到七點幾，間餐廳長期好似冇開冷氣咁，可能因為佢係開放式廚房又長期打開咗去後樓梯嗰度門，就算唔食嘢淨係坐喺度真係好熱🫠另外佢燈光亦非常之昏暗，如果我為咗影靚靚打卡相黎一定會好失望。
當晚我哋兩個都食唔飽，只係想快啲食完快啲走，去第二度食嘢🫠完全唔理解啲好評喺邊度嚟
