季季紅風味酒家 (已結業)

難得有家人由加拿大回港，全家人決定出去食餐飯洗塵，屋企又坐唔到咁多人又唔想煮，咁就梗係出去食啦。我地一行十二人，就梗係行一圍菜。先黎講白菜豬肺湯：就比較咸，飲得出有味精，d湯渣得好少，但豬肺洗得算乾淨，如果少d鹽就更好。有米豬：季季紅名菜：真係好大份，隻乳豬肉比較多，但食得多會好油，皮好脆，但味道就偏淡，個飯因爲被乳豬包住所以比較油，炒飯入面有蝦米，芋粒，仲有d好似柴魚咁嘅野。我地9個大人3個小朋友都食唔哂要打包拎走。西蘭花炒斑片：斑片都係偏淡，但好大塊，成份餸嘅份量真係好大份 西蘭花偏硬。菜膽斑頭腩：好腥........炸金蠔：佢面頭包住左一堆豬肉，中間先係蠔，所以件蠔係好細粒。但豬肉偏咸，蠔就欠缺蠔味。金蒜粉絲蒸大元貝：個元貝完全冇味....但係底嘅粉絲勁咸....上湯浸時蔬：係菠菜同雜菌，仲有杞子。味道都係偏咸。仲有個炸子雞冇影到相，但皮夠脆，但一樣個雞偏咸。壽包：都係平時食嘅一樣，冇咩特別。成圍菜2千2百蚊左右，就冇飲品嘅。酒樓夠大所以好多位，服務都不錯，只係食物全部一係好咸一係好淡....水準好唔平均。