茶茶台式料理 (已結業)

係旺角個行完街，喺新寶戲院前少少 見到呢一間茶茶台式料理，俾佢門口嗰隻恐龍仔logo吸引到，而且見佢感覺干淨，裝修輕鬆，咁我就同朋友入去試一試啦！呢一間台式料理主要係食火鍋，總共有六個口味，而且有一個叫招牌臭臭鍋，雖然好想試，但係因為見到佢係有隻辣椒係隔離，我又唔識辣嘅，所以冇叫到😹！不過見佢嘅材料都係臭豆腐，米血糕，滷大腸，食辣嘅朋友下次可以叫黎試吓。今次我哋就叫咗一個沙茶牛肉鍋，價錢都係108，感覺好似好抵咁！雖然佢都係有辣椒仔係隔離，但問過職員佢話唔辣嘅，所以我哋就叫左。驚佢唔夠飽我哋另外仲叫咗個烏冬添！大約10分鐘左右就上菜啦，火鍋湯底有少少淡口，如果沙茶再濃啲就更加好，不過味道係好食嘅！而且配料有好多蔬菜，有娃娃菜同椰菜，食落都唔會太罪惡感，清清地好似健康d！另外我哋見到佢門口有個沖手搖飲品嘅位置，咁我哋當然要叫返杯台式飲品試下！本身我哋想叫一杯芝士桃桃，但係咁岩冇晒，所以改叫咗一杯芝士莓莓！飲落又真心好好飲，佢啲奶蓋係拍得住<喜X>！ 搞到我一個人飲咗兩杯，飲完真係勁大罪惡感😂