樂糖 (已結業)

偶然會來將軍澳搵朋友食飯，不過呢邊都係第一次來，原來咁近地鐵站嘅屋苑，都有幾間餐廳可以選擇。今次就同朋友揀咗食甜品做下午茶。菠多椰皇($48)，新鮮菠蘿片好鮮甜，外表仲有微微燒過嘅焦糖。菠蘿沙冰打得夠細滑，味道清新食落去好消暑。加埋椰肉同椰汁又估唔到都幾夾，成個甜品食落真係透心涼嘅感覺。迷你抹茶紅豆班戟($32)，煎得薄薄嘅班戟皮食落有少少蛋香，包住抹茶紅豆味嘅忌廉，唔會太甜，上面仲有兩粒煙煙韌韌嘅白玉，如果可以多幾粒就更加好啦。紫薯拿破崙($29)，估唔到個拿破崙食落係咁香脆，中間擠咗滿滿嘅紫薯蓉，味道天然得來唔會死甜。上面仲有忌廉，而且細細舊食起上嚟都好方便。