佐敦醬缸既醬油蟹雖然非常美味、大隻、爆膏，但地方實在太細，坐到頂手頂腳、迫迫夾夾好唔舒服，而且服務麻麻地。要有冒險精神，發掘多一點好去處呢 ﹗
地方寬敝又密度低，空氣流通、抽風又好，完全感覺唔到大油煙或污濁氣味，環境真的不俗。侍應們都是操外語呢，只是懂一點點廣東話，大多以韓文或英文溝通。
估唔到水刺有大量傳統韓國料理，部份款色仲好少見添 ﹗反而烤肉選擇就比較少，貴精不貴多。料理樣樣都試啊，今晚兩口子飯聚，不能叫太多，要慬慎一點，唔想浪費，好頭痛呀。
雖然朋友仔還未到達，但我已心裡有數要點什麼菜了 ﹗高質烤肉仲勁多料理，唔係一味燒燒燒，醬油蟹、水刺頂級牛肋骨、醃龍蝦、特選黑豚柳、豆腐黑鱈魚辣湯、凍豆漿麵。
今晚我兩為醬油蟹而來，當然主角係蟹呢，醬油蝦、鮑魚都要三天前預訂，無緣一見。朋友仔不食牛，我唯有自己一個擔起一整份頂級牛肋頭啦，正呀，哈哈 ﹗
叫碟特選黑豚柳比朋友仔，再加多隻龍蝦。當然要飲湯，水冷麵食過多次，見有季節限定冷豆漿麵當然又要試。食住先，睇睇份量，唔夠就再添啦 ﹗
玄米茶，飲過最好飲既玄米茶在這裡，香純甘香無窮，呷第一口既時候真的彷如聽到叮一聲呀！何解那麼可口？驚喜萬分 ﹗
叫壼米酒開開胃先，但朋友仔唔多欣賞酸酸甜甜既味道，層經有其他朋友形容為洗米水呢。其實因為唔想太快醉，所以無叫一向飲開既真露燒酒之麻。
韓式 5 小碟：牛肉球，好有趣，我還以為係豬肉獅子頭添。普通醃過的免治牛肉做成球形蒸熟再放涼，咬落肉鬆一粒粒散開，機攪肉醬效果。帶甜豉油味道，牛味不太出令我有所誤會呢，整體算滿都不錯，我成舊食晒。
酸蘿蔔，爽脆又夠酸，醒神醒腦、活力充沛，咬多兩條先。芝麻菠菜，爽甜又多汁，趙到索索聲，咸香出眾，芝麻味倒不太食到。赤豆，非常得意既質感，豆類居然嚥嚥韌韌，跟紅豆味道幾乎一樣，微甜清爽不嗆，為何我食到有點奶味呢？
自家醃泡菜，香辣甜酸濃厚，非常獨特好味，放係醬油蟹紫菜撈飯塞入口，好食到打冷震，停唔到口！淨食泡菜酸辣香甜有齊，多汁美味。
醬油蟹配紫菜飯，萬眾期待今餐既主角醬油蟹隆重登場 ﹗音樂奏起，用熱烈既掌聲襯托，侍應緩緩優雅地將醬油蟹放下。我係訂位時已留定一客兩隻，免得出什麼意外，突然賣晒就死喇。試過係紅磡韓烤兄弟食醬油蟹，侍應妹妹會幫我拆晒肉連蟹膏撈埋個飯送上架，服務熱情周到，我直頭想攬住妹妹黎鍚呢 ﹗
蟹既呎碼似乎細了一點，蟹膏亦少了一點，雖有點失望，但食先講啦 ﹗當然先品嚐蟹膏，蟹肉不用緊張，隨後就到您喇。將白飯跟紫菜撈勻，放飯到蟹蓋上，便可蟹汁蟹膏混為一體即狠狠地掃入口中 ﹗
甘甜鮮味滑滑蟹膏擁著飽滿紫菜飯粒，咸香清爽芳香，各種味道跟質感撞得精采絕輪，複雜多變得難以形容，總之係太過好味喇 ﹗消滅完蟹膏後，即刻到蟹肉 ﹗將所有蟹肉擠到紫菜飯粒上，大量黏黏滑滑蟹肉跟飯粒融合，水潤滑滑蟹肉鮮味衝擊著味蕾，可口極致 ﹗
我想將味道再推到更高層次，就讓自家醃泡菜溫柔地躺在蟹肉紫菜飯上，碌入口中。甘甜咸香辛辣微酸，爽嫩脆彈滑黏，嚥韌軟棉，打得火熱 ﹗整碗飯被我清得一粒都無剩呢，好好好好味呀 ﹗
豆腐黑鱈魚辣湯，我最愛飲熱騰騰既湯，中、西、日、韓、泰、法、意、等等，都要叫個湯黎暖暖胃之得。勁熱石鍋盛著靚湯送上，各式各樣既材料裝得滿滿，份量十足 ﹗
沙蜆、豆腐、蘿蔔、大蒜、金菇、黃帝菜、紅椒、等等，包羅萬有。嗒啖熱湯，非常香辣而濃郁既味道，還散發著豐富鮮魚香氣。黑鱈魚肉滑彈味道有咬口，厚厚的像斑球一樣啖啖啖，魚皮黏而彈，好味啊 ﹗
醃龍蝦，好似無咩野食咁，黎多隻龍蝦之得。居然係醬油醃龍蝦添，無緊要，試試。醬油咸香霸道略重口味，幸好燒得爽彈而保留龍蝦鮮味，除左咸左少少外，好好味 ﹗
水刺頂級牛肋骨，不想獨自快樂，但朋友仔唔食牛的呢，我唯有一力承擔 ﹗ 重份量切得厚厚，顏色鮮艷又潤澤，脂肪紋平均又幼細，一睇就知好野黎喎 ﹗
平時食据扒、打邊爐食牛只要 3 成，不過韓牛要食 5 成或以上，熟一點帶令牛味更濃更突出。先黎啖原味，牛脂豐富牛味濃，肉質軟棉棉好 soft 啊，好舒服 ﹗沾上烤汁添上一點清爽味道，又可以減輕油膩感，能夠食得更多呢 ﹗整碟牛都係我一個包辦，好食好食 ﹗
特選黑豚柳，唔係吹水口輕輕，堅係特選高質黑豚柳啊 ﹗一試便知龍定蟲。燒到表面燋香微脆，入口外脆內嫩，勁彈牙勁 juicy ﹗肉汁澎湃，一咬激射，肉質有嚼勁，豬肉甜味出眾，非常高質。
水刺頂級牛肋骨、特選黑豚柳，好多肉啊 ﹗烤肉正到痺，開心死我 ﹗但朋友仔都已經好飽了，只能試幾片黑豚柳，其他都要讓我處理喇。
夏季限定凍豆漿麵，最初坐低已經非常好奇，好想試新野呢，我依家已經八九成飽，唔理咁多，叫左先算 ﹗跟一小碟砂糖咁有趣既？淺呷一口豆漿先，好咸呀 ﹗估您唔到會係咸豆漿，而且係勁咸囉。加一半砂糖試試，依然好咸。將全部砂糖落晒，但完全中和唔到咸味，味道變得更怪。
時令韓國傳統凍豆漿麵完全食唔慣，重咸味重芝麻味豆漿有趣搞笑，硬食左兩小注始終頂唔住，無奈地要成碗放棄。凍豆漿麵極咸，就算倒左成碟砂糖都唔掂，勁重芝麻味。但侍應哥哥話有花生醬的，但我完全食唔出囉。
今晚豐富晚餐多謝 $1600，但朋友仔投訴我食得貴，亂花錢呢 ﹗知道喇，我會節制、節儉一點架喇，今時唔同往日一個人麻。
1
1
