越食 (富華廣場) (已結業)

長沙灣呢間越南小店真係唔錯，今日嚟食好有驚喜越式蒸粉包好味炸蝦餅大件夠彈牙，不過有d油膩。火車頭湯檬湯底唔加醋都好夠味，配料夠多，肥牛唔會鞋口、牛丸彈牙夠味、牛腩炆得夠淋、牛柏葉就細塊咗d、最重要係湯底好重牛骨味，第一次食越南粉會飲哂d湯，味道好過好多出名越南餐廳。青胡椒燒春雞肉質嫩滑，雞胸都唔鞋口，配埋個秘制醬汁甜甜地好夾味，不過我覺得胡椒味要再重d會好味d。跟餐仲有兩杯飲品埋單$228免加一非常抵食。