Beerliner German Bar & Restaurant (屯門市廣場1期)

排隊既時候受到不公平對待，門口負責登記既員工做法好差，我地等左60分鐘終於排到第一，但突然佢叫左我地後面排緊隊既一堆人入去。我就問番佢，點解後面7位會快過我地7位？之後佢就講話係跟登記去安排次序，我就唔係好明，問佢咁點解排後面會入先過我地？係咪登記時出錯？但佢就一味帶我遊花園，答非所問，之後佢仲借啲椅走左去，其實佢果下係未解決到我既疑問。跟住我襯佢行開就想望下張登記表，點知個員工番黎見到，將個登記板反轉唔俾我睇，態度很差。之後經理應該係見到我一臉疑惑既樣，就黎問我咩事，我就講番情況佢知，佢就講左幾句安慰我話好快入得，我都明個經理唔係監察住個登記情況，唔會幫到我啲咩，因此我真係好無奈，不過我覺得果位K字頭既員工做法同態度都極度需要改進。最後因為唔多大檯，我地要等多20分鐘先入得，所以都幾谷氣。

不過食物方面叫做加番啲分，都算有水準。必叫既當然係烤豬手，另外亦叫了洋蔥煙肉Pizza，腸仔拼盤，一個飯一個意粉。烤豬手外脆內軟，味道唔會太咸，非常適中，值得一試再試；Pizza 配料配搭做得很好，醬料不錯，味道也不錯；腸仔拼盤今次既水準就不及之前，有少少失手，感覺係煮過龍了；飯意粉就正常。之後叫左三層甜品拼盤，上層係朱古力蛋糕，中層係類似莓醬香草甜餅，下層係類似蘋果批。我平時不喜歡食朱古力蛋糕，但佢呢個味唔同出面普通蛋糕，唔會太漏，味道又唔會太甜；香草餅不錯，甜甜地再加埋果醬，味道配合得好好，口感亦不錯；蘋果批就正常。

總結和後感：雖然食物水準唔錯，但員工質素有待改善，如果做服務行業係咁既水準，的確唔合格，亦令我對呢間餐廳整體減分。同埋有留意到其他評論都有講入座安排既問題，希望餐廳和經理都會多加注意和正視。