樂園 (已搬遷) 新店位置

今日同個FRIEND去左ISQUARE行下街，睇下野，閒談間得知ISQUARE附近有間食物以美少女為主題裝飾既CAFÉ，二話不說當然要去朝聖一下啦！上到去先發覺原來呢到有兩隻超級可愛既肥貓幫手招呼客人的，我個FRIEND連單都唔記得落剩係係到掛住撩兩隻貓玩。我地叫左個2位用的開心．少女風下午茶SET，除左有廿件茶點外，仲包兩杯野飲及兩個蝦蝦沙律。首先講下個沙律，蝦既份量唔少，而且都幾大碗下，酸酸甜甜食得好開胃﹔飲品方面因為我同朋友都係愛茶之人，所以加了廿元轉左飲玫瑰花茶，整個茶壺連火爐一併上檯，一來可以不斷坐熱D茶，仲可以不斷要求加水再沖新的茶，飲了兩三個鐘茶味仍沒有太過沖淡呢。而茶點呢真係整得好有心思，擺放得好工整，食物上既美少女裝飾閃令令好靚好有笑女情懷，食物質素整體不俗，甜點不過不失，都係大路野雪糕呀曲奇呀鬆餅呀窩夫咁，反而幾款咸點既味道有所驚喜。不過可能係因為我地未食午餐既關係，覺得咸點既份量相對少了點，如果可以再多一些咸點選擇就更加完美。