大滾友火鍋

去到元朗Yoho Mall附近有一間新開嘅店，啱晒而家凍冰冰可以去打邊爐！一入到去被佢宮庭式嘅設計吸引着，裏面嘅裝修同埋擺設全部用彷木造，我哋坐咗係卡位。3個人開始開餐。見到張點菜單我都嚇咗一下，全部都係一啲俗語，但係我哋會會心微笑。有一個叫做「飽暖思牛肉」，感覺就好似飽暖思淫慾咁嘅意思，真係笑爆咀。佢哋個店主都話佢哋嘅主打係牛肉呢！由於有一個朋友未到，我哋先打住嗰啲易熟嘅邊爐配料，分別係竹笙淮山同響鈴，個響鈴同我哋平時食嘅好唔同，因為今次呢一款係用鹹蛋去做夾心，職員話佢哋嘅響鈴係佢哋親手店裏面自己親手打造。食落去嘅時候特別鬆脆！我好欣賞佢嘅蛋黃，鹹鹹地咁，佢嘅質感令人增加左口感，雖然我朋友就話佢喊得濟而且有啲熱氣，但係我覺得佢拿捏得啱啱好，放入滾湯裏邊煮20秒就可以食。之後我哋叫咗啲沙蜆價值＄68，大概都有20隻，放左落去火鍋爐嘅中間，咁就可以清楚啲見到佢哋幾時打開個口，就可以食得啦。要讚一讚佢哋嘅花膠雞湯，佢哋嘅店員會好細心幫我地將花膠剪開，放入湯裏面煮，大概5分鐘我哋就可以食啦。啲花膠煮得好腍，有啲似啫哩狀，而且雞油和花膠滲出來的骨膠原配合，整個湯底變得有點杰身，諗起都覺得好補。