今次同米菲又嚟返元朗天空之城嘅醉辣鮮，懶得走去第2區，呢度食海鮮都幾掂㗎！之前試過佢哋嘅蒸海鮮質素好好，今次決定再嚟一次海鮮火鍋套餐，正到爆！
套餐包咗一款鍋底、六款可以自己去水箱撈嘅海鮮（生蠔、鮑魚、扇貝、蝦、沙白、大蜆）、一款肉類（美國安格斯牛肩胛或西班牙栗飼肉揀一款）、三款丸類（各兩粒），仲有小食同蔬菜任你食晒！
鍋底叫咗開心鬼雞煲，辣度小辣，雞煲份量十足，雞肉嫩滑入味，好啱口味。 丸類推爆芝牛丸，芝心拉絲，一咬出嚟真係有驚喜，要小心燙口！ 小食揀咗脆皮一口豆腐，皮薄又脆，入面豆腐滑溜溜，唔會油膩，真係酒樓水準以上。
蔬菜區任你揀，多款生菜、金菇、粟米、翠玉瓜、粉絲等等。
飲品要散叫，JUMBO凍檸多同鮮水果凍花茶大杯得嚟又抵飲，果汁味濃，酸酸甜甜好解渴，仲有果肉食添，爽！
人均三百蚊左右，飽住走，假期去一定要預先訂位！ ———————————————— ─ 🔎 𝑀𝑜𝑟𝑒 𝐼𝑛𝑓𝑜𝑟𝑚𝑎𝑡𝑖𝑜𝑛 ─ 評分📝: 8.5/10
地址📍: 醉辣鮮 | 元朗錦田高埔村110號天空之城地舖
