逸之燒 (已結業)

今日早收工，心血來潮想食串燒！因為之前已經同朋友食過位於雞地間逸之燒，印象中都唔差，所以二話不說就再去幫襯。晚上6點左右入座，我哋係第一枱客，所以2個人可以坐個4人位都好舒服。串燒主要都係分為鹽燒系列、汁燒系列同蔬菜同海鮮。打頭陣係雞泡魚乾，配上蜜汁燒，燒得唔會好乾身，因為坊間有食肆真係將呢味菜燒到乾柴烈火咁，所以呢碟係水準以上。鹽燒方面點選咗五花串、豚肉荔枝串、牛脷串：五花腩脂肪同肉嘅比例係5050，脂肪食落非常香但唔油膩。我最愛嘅豚肉荔枝串，再食嘅感覺依然一樣好食，鹹中帶甜。至於汁燒就揀咗豚肉蘆筍串、安格斯牛肉車厘茄串、安格斯牛肉大蔥串、茄子串、安格斯牛肉金菇芝士串、月見免治雞肉棒：咁多款入面我比較喜歡車厘茄串，因為車厘茄嘅酸甜可以完全中和到燒汁嘅鹹味，值得一試！另外仲有叫咗銀雪魚西京燒、炸軟殼蟹、牛油蒜香翠玉瓜串、燒飯團：值得一提嘅係燒飯團，外面燒得焦香，咬落香脆可口，份量對兩個人嚟講絕對適中。其實餐廳都有其他日式食物，包括刺身、壽司、鍋物等等，不過始終區內真係少日式串燒店，所以我嚟到淨係食串燒，有機會的話會再試埋其他款式！