江浙滬 (堪富利士道) (已結業)

中國咁多個菜系當中，最鍾意食就係江浙滬菜，可惜係香港食真係好貴，而且味道唔係間間都好，重點係其實香港唔算好多食江南菜嘅地方，咁啱俾我發現到呢一間，有特色之餘，價錢都唔貴，一於試試佢。首先餐廳嘅裝修風格好有江南特色，走中國風，牆上仲有一啲詩情畫句。至於食物選擇方面，基本上熱門嘅菜式都有齊，選擇好豐富，仲有時令菜品「蟹粉」不過我本身麻麻哋蟹所以就冇嗌到。《花雕醉香雞》$68酒味好香，唔會太過濃烈，對我來講啱啱好，而且雞肉都幾滑👍🏻👍🏻《特色煎餃》$48就咁睇相已經覺得好吸引，估唔到味道真係好好，外皮煎得香脆，不過略嫌有少少厚，餡料份量多，主要係豬肉，整體值得推薦。《XO醬炒年糕》$72雖然餐牌上有辣椒圖案，但其實完全唔辣，不過枱上面有辣椒醬可以自己加，值得一讚係辣椒醬好好味！如果XO醬味道再濃啲會更好，但年糕口感煙韌，恰到好處，不錯，份量都好多。《松子桂花魚》$168桂花魚唔算大條，炸粉不算厚，亦都唔會好韌，入口尚算脆，不過味道有點甜，未必人人喜歡。 整體來說，我覺得質素不錯，重點係價錢一啲都唔貴，所以性價比真係幾高，想食上海江浙菜嘅話真係值得一試。