文樂園

講起香港點心蒸飯外賣店，你一定諗起個兩間舖，唔開名啦，又唔係講佢，講黎做咩姐，除咗戒口時貪方便幫襯下佢，你覺得幾時會食到呀？

但係文樂園就完全唔同，雖然大家都係做點心蒸飯，但人地係做番酒樓陣味比你食。文樂園is established by 1947，係香港專營手工包點、點心及盅頭飯嘅老字號。近年仲設有外賣店係何文田，正正係培正中學對面。從店舖以懷舊風格設計，到以傳統「點心車仔」嘅裝飾，睇得出店舖希望帶比食客一種昔日懷舊香港點心嘅味道。

今次小妹專程空肚拜訪，叫咗幾款點心醫肚仔，祭五臟：

🧆七色燒賣（$48）
🍚瑤柱咸魚蓉蒸肉餅飯（$28）
🥟花膠灌湯餃（$38）
🍵南北杏雪梨燉龍骨（$38）

文樂園仲有唔少套餐可以選擇，比如一飯+一點心+湯 都係 $70。每晚7點半特價時段，點心蒸飯仲一律$18。

傳統燒賣，創新口味！分別有粟米、芫荽、黑松露、菠菜、蟹籽、麻辣及芥辣。芥辣味加入到燒賣裡面出奇地夾，瞬間變成日式fusion 菜！麻辣味唔太辣，而且味度好均勻！我個人最喜歡食黑松露味，個陣黑松露野菌味唔似酒樓就咁放兩粒野係面，佢係搓勻喺燒賣餡裏面，超好味！

$48

一大堆瑤柱係面，果然無揸流攤呀！肉餅一d 都唔係奧運見到嘅鐵餅咁結實乾硬，反而多汁軟滑！飯仲係用咁泰國絲苗米煲起，粒粒分明，水份適中。外賣時都跟咗一盒仔豉油，原來都係舖頭以葱蒜精心調配，唔怪得跟平時盅頭飯豉油唔同啦！

$28

就算夏季都無時無刻想飲湯水。是日靚係南北杏雪梨燉豬尾龍骨湯，一盅裡面可以清晰可見湯渣，包括有雪梨、紅蘿蔔、龍眼肉同果皮等等。

$38

聽到花膠兩個字，好自然會搵下舊花膠係唔係到。唔係好難搵，佢就係灌湯餃隔離，幾大塊下架～湯底亦好鮮甜！即係成個人滋潤曬！

$38