Uni-Coffee-Versity (已結業)

琴晚同fd 出觀塘行街行到攰，途經呢間西餐廳，見到裝修唔錯，所以就求其搵個位坐低醫肚先。 我地首先叫咗三文魚沙律，見到佢加咗啲出面少有嘅配料，例如橙＆南瓜＆提子乾，睇落colorful啲，而且啲沙律汁同啲菜拌得好勻，唔會搞到啲菜一啲有味一啲冇味。以一碟前菜嚟講，絕對唔hea, Good👍👍 至於main course, 我地就嗌咗"水牛芝士蕃茄大蝦龍蝦汁扁意粉" ＆ "珍寶牛肉漢堡" 。可能我仲箍緊牙啦，所以我就覺得意粉比較硬身，但我同行嘅fd 本身鐘意食硬身意粉，所以佢好like, 話個軟硬度啱啱好。而龍蝦汁味濃，唔稀，條條麵都掛到醬汁，啖啖有好濃郁嘅龍蝦味，配埋大蝦好正。😋😋 而個珍寶牛肉漢堡，因為我覺得佢除左有個足量嘅牛肉扒＆車打芝士之外，仲以酸甜青瓜＆千島醬作配搭中和番，所以食落肚唔會覺得太膩😜 最後我地嗌咗牛奶抹茶同埋特飲熱情果梳打。我個杯梳打都幾好飲，唔會太甜，感覺清爽。因為我覺得平時飲品鋪飲嘅熱情果太甜，成陣糖漿味，呢度嘅熱情果梳打就唔會咁啦，而且佢加咗啲花瓣碎落杯嘢飲度，撈埋嚟飲更加清香。