一直念念不忘
喺香港一直好想搵一間烤魚嚟食下
朋友話最近見到一間食冒菜嘅有三峽烤魚食
即刻約黎試一試佢！
一入出𨋢就見到好多講普通話既人黎攞位
即刻有一個感覺就係間野一定好地道啦
我哋一行四人叫咗一條三峽香辣烤魚配10個配菜
佢嘅配菜有好多選擇全部都係一啲能夠吸味嘅蔬菜類菇類
侍應同我地講呢度嘅烤魚唔同出面嘅烤魚
佢哋嘅烤魚同埋配菜都係會預先整熟晒
所以嚟到只要滾左一滾
然後教細火暖住佢就OK啦
呢個最啱我哋呢啲餓鬼
菜黎到唔駛等即刻食得
令我哋好surprise嘅係呢度嘅烤魚竟然係用多寶魚
清蒸多寶魚就食得多啦 烤魚就第一次食啫！
多寶魚唔使講一定係好滑
而且食得出佢啲條魚係好新鮮嘅
亦都唔會煮得過老
但係唔知係唔係呢款魚嘅關係呢
佢唔係好吸到佢嘅湯 唔算太入味
有啲魚還魚 汁還汁嘅感覺
但講到佢嘅汁就非常之出色啦
我哋叫咗小辣嘅關係唔算太辣
連唔識得辣嘅朋友都話好食
而且佢好香 好惹味
我哋叫咗啲配菜有金菇蘿蔔薯仔唐生菜貢菜芋絲蓮藕片玉子豆腐冬瓜片豆皮
呢啲全部都係啲好吸味嘅嘢
而且越煮越入味非常唔錯
我哋之後仲加多左一個土豆粉 無得頂！
為咗解辣我哋都各自叫咗一杯野飲
值得推介嘅係佢嘅原葉凍檸茶
叫佢嘅原因係見到隔離枱飲緊我哋以為係金橘檸檬
點知侍應同我地講係凍檸檬茶話嗰啲係茶葉嚟嘅 見到幾吸引就即刻叫咗杯
佢嘅茶葉帶有少少嘅甘甜味就算我哋冇加糖水都覺得夠味
侍應同我地講話佢哋本身係賣茶葉起家嘅
所以我哋都覺得佢嘅茶製品非常值得推介
就算佢杯茉莉蜂蜜佢嘅茶味都好香好濃
唔錯
下次嚟我應該會試吓佢啲麵食
因為真係太多人嚟食啦
佢嘅烤魚汁咁好食
佢嘅湯麵都應該唔會差啦
