幸福堂

一間接一間飲料店開幕，週日過海食午飯，飯前就黎巡巡鋪，原本我都唔係效率咁高嘅人，諗住幸福堂、珍煮丹是但試一間啦，點知後者未開門。咁就唯有排下幸福堂啦，開門前黎到，前面都有廿人；唔好以為老虎堂冇人等，條龍差唔多長。

1

門面唔大，排成一條隊，拎飲品嘅會集中喺店面；過程唔算流暢，並非不停接單，而係買下又停下，等佢炒珠，部份人買十杯八杯又要入袋包裝，變相效率唔高，最終等左45分鐘。標榜手炒黑糖，有店員會喺店面炒珍珠。名字叫幸福堂，店前有個籤筒可以抽籤仔、百子櫃附籤文註解，好在抽到【上上】啊大佬。

餐牌供應十多款飲品，例如鮮奶、奶茶、紅、綠茶、泰茶、抹茶等，定價$22-38。原本聽人講話第一日只有黑糖鮮奶一款，仲以為我第二日去，會比較齊全，點知都係得黑糖奶同檸檬類唔想排咁耐飲杯吸引力唔高嘅檸檬，所以最後買左兩杯黑糖奶。

焰遇幸福黑糖珍珠鮮奶 $30
賣相唔錯，黑糖倒滿杯邊，紋路持久。珍珠份量1/4，到手微溫。鮮奶並非封口，喺面頭加一層所謂厚奶再炙燒，炙燒效果做樣而已，對味道影響不大。唔搞勻直接飲，黑糖都唔夠香甜濃郁，味道主要來自珍珠本身跟餐牌指示攪拌18下之後，只有奶味。用明治奶，毫無疑問，奶味很重。珍珠有微微黑糖味，質地偏軟腍，待溫度降低後食會好啲。不過，最大嘅缺點係飲左半杯後，一粒粒嘅粉末感覺好明顯，兩杯如是

焰遇幸福黑糖珍珠鮮奶

$30

排隊45分鐘都唔算太難受，至少當日冇落雨，排兩、三個鐘，就不了。味道方面普普，不在回訪之列，可能我個人較嗜甜，哈哈。

平時飲黑糖但又嫌太甜嘅朋友，或許會覺得適合。