出左地鐵站後，我就向住「韓一窩」出發喇！雖然小店嘅位置有啲唔顯眼，我都行過左龍少少，不過其實離地鐵站好近，好快就會行到。本來諗住時間先係十二點幾，而且今日係星期六，香港人應該冇咁早食午餐嘅，所以小店裏應該唔會有太多人用餐。點知原來我係錯哂架，嗚嗚！到達小店時，一眼望去，估唔到幾乎係滿座啊，而且座位其實係好逼的，好好彩仲有一張小枱仔剩，我當然即刻九秒九入去坐低啦！
小店嘅料理選擇雖然係唔多，不過價錢幾平民，所以睇餐牌時我有好多款都想試啊～ 最後，我揀左泡菜海鮮湯飯同埋炸蝦餅黎試試。
泡菜海鮮湯飯 ( $55 )
首先上枱嘅係泡菜海鮮湯飯。小店嘅細心真係值得欣賞，海鮮湯同飯係分開上架，所以唔會令到啲飯喺食客進食時長時間吸收海鮮湯而影響口感。白飯上鋪滿了紫菜，感覺好好，我應該唔需要餸都可以清左呢碗白飯呢，哈哈！
而海鮮湯一睇就知用料十足，材料有大大隻蝦同花甲丶泡菜丶蕃茄丶椰菜丶金菇，仲有墨魚滑。雖然每款材料份量唔多，不過加加埋埋就變得好豐富，而且咩都有啲就最岩為食嘅我啦～海鮮湯幾清唔重口味，帶微辣，今日天氣咁凍真係好適合飲呢個湯，我飮完即刻暖笠笠啊！而另一令我覺得貼心嘅事就係啲蝦身嘅殼已經被小店處理左，令我食蝦時變得方便好多啊！\(//∇//)\
炸蝦餅 ( $48 )
蝦餅岩岩炸好，好新鮮啊！雖然蝦味唔夠，不過口感外脆內裏都幾彈牙，配埋泰式酸辣醬，整體都唔錯架！
總括黎講，呢間小店嘅料理雖然味道唔係一流，不過由料理嘅細微之處都感受到小店嘅誠意同貼心，呢樣係最令我有驚喜嘅！可惜我係住喺遙遠嘅他方，唔係嘅話我相信呢度應該會成為我嘅飯堂。希望住喺附近嘅香港人都支持一下呢類越來越少見嘅小店啦！（＾∇＾）
