黎之前有睇過呢間餐廳嘅介紹，話佢係一間上海派俄羅斯菜嘅餐廳，但一直都唔明點解上海會同俄羅斯菜扯上關係。直到入到餐廳，見到枱面餐紙上嘅介紹就即刻真相大白。
上海派招牌羅宋湯
黎到俄國菜餐廳第一刻當然係試下俄國菜最著名嘅羅宋湯先。湯非常足料，雜菜同肉煮得好淋，好易入口。味道拿捏得恰到好處，唔會好似出面餐廳咁太甜或者太酸，當作開胃一流
俄式薄餅 (俄式薄餅，酸忌廉，紅魚子醬)
俄式薄餅上有一層酸忌廉，頂層有紅魚子醬，味道剛好就是由甜至鹹，味道平均。俄式薄餅個口感食落好似雞蛋仔咁，比起我地想象中更漲卜卜。
香煎黑毛豬配蘋果汁，薯角
黑毛豬嘅表面煎得剛剛脆，肉質鮮嫩，食落唔會有太老嘅口感。黑毛豬配搭有蘋果醬，一齊食大大減低黑毛豬嘅肥膩感。
羅勒香草醬帶子炒意粉
帶子厚肉，上下略略煎過後上碟，口感一流。而更感到驚喜嘅反而係平平無奇嘅炒意粉。一開始見到個意粉有頗多嘅橄欖油以為會好油膩，但炒意粉拌以洋葱，西芹，紅椒，青椒，令整個炒意粉變得好清新同埋個口感好豐富。
Cookie Smoothie
咁啱撞正有第二杯飲品半價優惠，就嗌左兩杯Cookie Smoothie，鍾意飲甜野嘅就千其唔好錯過呢杯飲品。杯smoothie打得好幼細，飲落有強烈朱古力曲奇嘅味道，加上cream topping，飲完一定有好大滿足感。
