善茶 (已結業)

善茶今日行過K11 ，過咗對面馬路，見到開咗間新茶店，裝修好懷舊咁，綠色白色嘅格仔瓷磚，真係充滿老香港嘅感覺，好似港式嘅大排檔，仲有幾個花籃，原來今日新開張，實在太好彩啦，因為今日有買一送一，同朋友一人一杯。抵啊。呢間茶店除咗裝修，亦都係主打港式絲襪奶茶,人一份情意結,個人更加鍾意港式奶茶。成家都好鍾意飲奶茶，媽咪會買一大包茶葉返屋企每朝早都會親自煲奶茶，所以對於港式奶茶特別喜歡，加咗煉奶之後覺得香濃又滑，亦都茶味香濃。間茶點亦都令我好想幫襯，最欣賞佢就係一份善心，每賣出一杯就會捐一蚊去慈善機構呢。可能由於新開張嘅關係，店員（老闆？！）好熱情咁樣同我地介紹佢嘅出品，佢都同我地提及佢原來係2016年跟一個師傅學習沖調奶茶呢。奶茶係用咗四隻茶葉自己溝成，有別於一般嘅茶水檔，用咗煲茶機。飲咗第一啖，覺得茶味香濃，都幾滑，最怕太苦澀同假甜味，由於係走冰嘅關係，所以茶味一啲都冇沖淡， 7分甜剛剛好，個人覺得已經非常夠味啦。至於珍珠，就不過不失，未至於太過出色，不過最緊要都係杯奶茶夠好飲。