麵 (已結業)

最近經朋友介紹，黎試中環一間新潮麵店。門面寫上一大個「麵」字，原來就係店名啦！環境唔算大，但坐得舒服。主打無味精製作，用上新鮮食材同天然材料烹調。店員態度非常友善，慢慢為我哋介紹佢地既 menu 🙂首先推介「Build Your Own Meen」，即係自己揀鍾意既配搭，咁就比較容易滿足自己既味蕾，哈哈！湯底同醬汁選擇各有四款，有辣有唔辣；然後有蛋麵、烏冬、油麵、金邊粉、米粉；不同既肉類，海鮮同蔬菜等等。因為我同媽咪口味都比較清淡，所以媽咪揀咗素食精選既「蕃茄湯底」。蕃茄味清甜，而且係滿滿既鮮番茄茸喔！配上金邊粉、溫泉蛋、豬肉丸、菜心、木耳；慢煮日式叉燒半肥半瘦剛剛好，入口軟嫩，值得一試。當日冇乜胃口，所以我就更加清淡，選清湯底一種既「招牌香滑雞湯」。配米粉、鮮蝦同兩款嫩菜。個人特別推介「特色檸檬雞」，經過慢煮肉質唔會乾，反而偏瘦仲好嫩添！另外點咗小食「沙爹串燒」。牛肉燒得過火，豬肉較為入味，附上既醬偏酸，有口感，但個人覺得可以落少啲青檸汁。噢！Menu 上仲有幾款飲品架！分別係泰式奶茶、鹹檸七、泰式龍眼特飲，仲有豆漿、可樂、檸茶、檸水等等。