頭盤個蟹膏多士真係一試難忘！多士脆卜卜，上面搽滿勁濃郁嘅蟹膏，鹹香鮮味，食完仲想encore！跟住個長芋明太子都好正，山藥口感滑溜帶脆，包住辣辣地嘅明太子，好開胃～
串燒方面，豬腩肉串燒到啲油香出曬嚟，但又唔會覺得膩。至於原隻燒雞腿，真係要畀個like個師傅！雞皮燒到金黃色，脆得嚟又keep到肉汁，咬落去仲有肉汁滴出嚟㗎！
牛魔王必試鹽燒牛橫隔膜肉！肉質軟淋得嚟又有咬口，簡單用鹽燒已經好香牛味，送酒一流～
主食兩款都咁吸引，搞到我都選擇困難！蟹膏燴飯伴芝士超邪惡，濃濃蟹膏同拉絲芝士撈埋一齊，香濃到不得了！而三文魚腩魚子丼就新鮮清爽，三文魚腩肥美，魚子卜卜脆，撈飯食好滿足～
總括來講，呢間新開嘅爐端燒無論環境同食物都好有驚喜，價錢中等但值得一試。下次約埋班friend去中環食飯，又多個好選擇啦！
