Tivoli 意大利餐廳

營業中

休息中

是日午餐有白汁雞皇同西班牙豬扒揀，同太太倆個都不約而同地，揀咗西班牙豬扒，一飯一意粉。餐湯揀咗羅宋湯，濃淡適中，唔會太辣太咸。仲要熱辣辣上場，合格有餘。相反，餐包一啲都都唔熱，好在唔太硬。牛油用凍水浸住，好處係保持到溫度唔會熔，壞處係比較濕。主菜上場，豬扒水準好參差，有兩塊好瘦好實淨，一塊好肥，一塊好腍。味道其實唔差，係口感怪咗啲。個汁甜甜地辣辣地，幾惹味。咖啡乃全場最大敗筆，帶苦澀而嚡。落多多奶都補唔返...呢度啲侍應都十分快手，雖然唔算好有禮貌，但都可以接受。食物賣相、味道都有唔錯水準，而且午餐只係$35 (另有加一小費)，值得俾個笑笑口。