好立克/齋咖(大杯)
好立克甜度岩岩好，唔會話落得太多沖劑粉而渴喉。咖啡都係一貫茶餐廳風味，大大杯好抵飲。
雞扒三文治(烘底)
雞扒用少少五香粉醃過，唔會太搶味，肉質鮮嫩，炸得非常香脆，加上搽左少少蛋黃醬食落唔會覺得好乾身，做得非常出色。
西多士
西多士炸得外脆內軟，加埋牛油練奶真係下午茶首選，同埋咁切法，件件都係邊，唔駛爭。
菜肉雲吞生麵
菜肉雲吞餡料勁足料，菜多豬肉肥瘦適中，醃嘅味道都啱啱好，生麵就鹼水味重d，但都好爽口，可以下次叫淨餃或者其他麵種。
誠記總係隔個幾星期就心思思想去幫襯嘅茶檔，無論食物出品、服務、一事一物都盛載住人情味。
