之前經過見到新開張,今日終於試到。位置有d隱蔽，我同R君提起呢度都會叫佢做「果個窿」😂。雖然外面望落隱蔽，但入面比想像中大，不過lunch time由公司行落黎好遠⋯⋯
時間關係，又有餐牌圖。
海蝦野菜天婦羅烏冬
個set一出現已經覺得d天婦羅賣相好吸引。（我覺得食物好食之餘，賣相都好緊要，先吸引到我食同食得開心😃）隔離個客人見到都話望落唔錯。
烏冬軟硬適中，但d昆布唔夠腍，湯底有濃濃的麻油味，味道中規中矩，個人覺得麻油味烏冬怪怪地。
天婦羅方面，有兩隻蝦天婦羅🍤，好食！最驚喜係野菜天婦羅，特別係茄子同南瓜，麵衣唔太厚，茄子同南瓜都勁腍，茄子皮批得幾特別（下圖）。
食完之後好飽，滿足左之前病既時候想食天婦羅既願望，下次有機會再試其他野😆。
