新永成茶檔 (東廣場) (已結業)

觀塘東廣場的食肆愈開愈多，平民化或中等價錢均有，要突圍而出並不容易。呢間開左唔耐的新永成茶檔，奇貌不揚，但聽朋友講話佢既豬扒唔錯，這天經過便去試吓。叫了一個辣肉醬豬扒飯，又整得幾惹味喎。豬扒是加上香茅去煎，較一般茶記的同類產品多了一份香味，肉亦不太乾，尚有少許肉汁。辣肉醬其實唔太辣，但又真係幾佐飯，最欣賞呢度仲加埋隻流心荷包蛋，篤穿它來拌飯一流。平心而論，雖然碟飯油膩了少許，對最近要減磅練跑的我不太適合，但純計味道真係幾好食。