河合居日本料理 (已結業)

今個星期已經第二晚幫襯河合居，可能今日係星期四關係，所以唔洗等位。由於今晚我只係兩個人嚟食，所以只係點咗三文魚刺身、甜蝦刺身、吉列豬扒蛋鍋定食同一個叉燒湯烏冬。先講三文魚刺身，厚切肥美、魚油充分，至於甜蝦刺就肉質紮實、彈性十足，可以話鮮甜回甘，吉列豬扒蛋鍋用嘅豬扒，相信係師傅用鎚鬆過，加入麵包糠炸至金黃色再加上雞蛋放在迷你鍋上，有種妙不可言嘅味道。而叉燒湯烏冬，所用嘅係厚切叉燒，同市面上一般選用嘅超薄切唔同，但入口唔會話好韌，而且好入味添，一問之下原來係老闆湯生秘制嘅。