海記合桃坊甜品 (已結業)

7人喺旺角晚餐後，通常都會去飲杯嘢，但當中有朋友當晚要返工或第二日早起，就轉去食糖水甜品啦！其中一對朋友話有間幾好，帶路下來到太子，原來係「海記」！其實尖沙咀嘅海記都去過，印象係算ok。太子店比尖沙咀店面積大，但座位卻迫啲。明白糖水舖唔好在乎咩服務質素，但明顯尖沙咀舖服務好過呢間好多倍喎！5熱2凍，7款唔同糖水為：沙沙合桃糊、合桃糊 & 合桃糊+芝麻糊 —— 食合桃系列嘅朋友話好好味，合桃真材實料好香，當中食粒粒合桃嘅朋友話有驚喜，好特別！薑汁芝麻湯丸 & 杏仁糊+芝麻糊 —— 另兩款熱糖水，薑汁湯丸正常無咩特別；杏仁芝麻亦都一樣話幾好夠香。紫薯香芋雪樂冰芋圓紫米露 & 薑汁雪樂冰豆腐花 —— 食豆腐花嘅朋友無比評價。我食嘅紫薯香芋冰紫米露，兩舊冰冰一樣好食，但放於紫米露中要點唔夾，而芋圓亦都一般。七碗糖水甜品，合供都只是$177，以今時今日嚟講的確好抵好親民。「海記」雖然唔會有令人「嘩」一聲嘅驚喜，不過算係久不久都可以一食嘅糖水舖。