新巴蜀風 (已結業)

呢幾日天氣又轉凍，一於同朋友食辣嘢暖暖胃。新巴蜀風係新開嘅餐廳，大約舊年11月先開張。店內裝潢以米啡作主色調，間隔尚算闊落。除咗有圓台同埋卡座之外，都有包房嘅服務。菜式嘅價錢唔算便宜。不過，聽侍應講，廚師係四川人，所煮嘅菜式係正宗四川菜。夫妻肺片係四川有名嘅菜式之一，材料通常有牛頭皮、牛心、牛舌、牛肚、牛肉等。而呢碟嘅材料就主要有牛肚、牛舌同埋牛腱，佐以紅油、辣椒、花椒、芝麻等拌食，麻辣鮮香。切得好薄，味道唔算辛辣。以前食過幹煸四季豆，覺得幾好味，而今次餐牌都有，諗住叫嘅，但見到原來有幹煸苦瓜呢款菜式，而之前又未試過，所以都想試下。苦瓜好爽脆，而且只係帶甘苦，就算平日唔鍾意食苦瓜嘅朋友，都覺得幾好味。是日亮點就係呢隻四川樟茶鴨啦！樟茶鴨鴨肉色澤粉紅，外酥內嫩，鴨肉只係連住一層薄薄油脂，食落好香口，推介之作。第一次試川北涼粉，質地好滑，無粉皮咁煙韌，反而有少少爽口嘅感覺，配埋酸辣的醬汁，好開胃。兩個人食咗$497，其實都唔算便宜，但如果想食正宗嘅四川菜，都係一試無妨。