探魚烤魚

營業中

休息中

五月頭上深圳食過探魚烤魚，回味無窮。今日行過APM，見到探魚原來有一人烤魚午餐，咁就好啦，以前一大鍋一個人肯定食唔晒，而家有一人一鍋，隨時心血來潮都可以過嚟食！新菜式？ 下次再嚟試吓，今次都係要返一人一鍋。好耐未飲過酸梅湯，佢加咗片檸檬同桂花，有好香嘅桂花味，頭嗰幾啖好濃，要等啲冰融咗淡咗之後就啱啱好 。等緊上菜嘅時候已經急不及待去冰粉吧整定碗冰粉先！上次上深圳，冰粉吧冇咁多選擇，又有好多其他客搶住攞冰粉，有啲混亂。相比之下，觀塘呢度就舒服好多。有齊晒我鍾意嘅桃膠，爆珠燕麥，同埋黑糖麻糬！原來一人餐都幾大份，又有豆皮，豆腐，大白菜 。烤魚仍然係好香，但完全冇骨，啖啖肉。😙但係唔知係廚房唔同定係一人餐嘅關係，整體調味唔係好濃，鍾意清淡啲嘅人就啱晒。可惜我好想食嘅糍粑竟然售罄…唯有點返個香烤花菜作補償。