蜜庵本膳 (已結業)

近日就比我發現左尖沙咀呢一間日式餐廳，環境好舒服，食物都好健康。今次就揀咗午餐三品定食，有沙律，湯，三道自選菜式，仲有甜品。冷盤主菜揀咗香菇菠菜，加咗少少沙律醬同麻油撈過嘅香菇同菠菜好開胃。燒物方面就揀咗牛油燒糖心番薯，切左片嘅番薯燒完之後好甜，焦香再加埋牛油香，健康之餘仲好好食！鍋物方面就揀咗味噌豆乳煮雞，味增同豆乳嘅味道比例啱啱好，雞肉亦都好嫩滑，鍋入面嘅蔬菜索晒d汁，送飯一流。提起飯，其實呢度飯都可以選擇白米或者十穀米，我當然揀比較健康嘅後者啦。味噌亦都好有誠意，入面有大量牛蒡絲同埋紅蘿蔔絲，味道亦都唔會過鹹。最後仲有甜品咖啡雪糕，雪糕質地好軟滑，而且咖啡味夠濃亦都唔會太甜。最後仲加咗一杯飲品抹茶梳打，真係第一次將抹茶加落梳打水入邊，原來有汽嘅抹茶都幾特別。一個人除咗食快餐/茶餐廳之外，亦都有更加好味同健康嘅選擇。