龍璽酒家 (已結業)

同長輩食生日飯，最好都係食中菜，於是就去龍璽。我哋揀咗$498一位嘅午宴，感覺啲嘢易食易吞啲，但食落似乎唔係咁……一般而言應該係按菜單上嘅次序上菜，但唔知點解個湯嚟咗先。個湯都幾鮮甜，深得老人家歡心。然後就上點心同冷盤，全部都係一般酒樓水平。腸粉皮有啲厚，感覺蒸得有啲耐；個鮑魚我食都覺得有啲韌，更何況老人家……芥末雲耳係冇芥末味嘅，甚至冇乜味，我見外公一直攞啲雲耳去點海蜇嘅醋……所以整體都比較扣分蛋白蒸龍蝦球到，仲有隻蟹箝，整體唔錯，老人家都易入口。炒菜苗係白菜仔，冇乜特別，所以唔影嘞。之後就上咗帶子粒泡稻庭烏冬。個烏冬正正常常，個湯幾好飲，都啱老人家食。整體嚟講，其實都係一般啦，有啲嘢好食，但中間夾咗啲好麻麻嘅嘢，畀我揀多次，我會去第二度，畢竟同長輩食生日飯，都想整體體驗係唔錯或以上。現場啲侍應都幾忙，好多時想叫侍應都要等一陣，但搞笑嘅係我哋等到窗口位冇人時行埋去窗邊影相，有個侍應就即刻出現攔截，叫啲老人家戴返口罩，比較大聲，語氣都好一般，令人感覺佢似演唱會保安多過似侍應，其實可以禮貌啲提醒，所以又係比較扣分嘅位。